Brynestad Klyngetun

Her er vi to familiar som skal starte opp med gårdsturisme i sommar. Vi treng di hjelp til å skape eit så autentisk og attraktivt tilbod som mulig.
Vi køyrer sterkt rabatterte prisar no fordi vi vil bruke besøket ditt til å lage produktet vårt for framtida. Om du tek turen opp og får sjå dei gamle husa, treffe dyra og snakke med oss så vert dine innspel på korleis vi skal utvikle tilbodet vårt framover høgt verdsett.

Skal vi hoppe i høyet? Kaste hestesko? Kunne mate dyra? Gå i fotspora til korleis dei levde for 100 år sidan, eller skal vi dra tilbodet i ein annan retning?
Det er dette vi vil finne ut av i samarbeid med deg. Og medan du funderer på kva du vi oppleve neste gang du kjem innom så får du sjølvsagt både kose med dyra og nyte naturen rundt oss.

Olden er kjent for sin vakre natur og utan landbruket rundt oss ville denne perla av ein tettstad sett heilt annleis ut, og derfor føler vi det er viktig å få fram den historiske delen av dagens oppleving av Olden.
Du kan få kjøpe deg ein liten suvenir og få ein kopp kaffi og eit glas saft medan du går rundt og tenker på kva vi kanskje skulle gjort annleis eller kva du likar av det vi har fått til.

Nokre dagar vil det regne, andre dagar er det sol, skal ein oppleve det same uavhengig av vêrgudane eller skal det vere aktivitetar tilpassa himmelens luner?
Det vi har av tilbod når du kjem er, eit autentisk hus frå 1800 talet, ein fjøs som er innreda med sitteplassar og ei mengde gammalt gårdsutstyr som viser kor tungt fysisk arbeid det var før. Vi vil ha dyr du kan mate og ikkje minst leikar som dei leika for 100 år sidan.

Alt dette og meir til håpar vi at du kan hjelpe oss med. Saman med dei som vil besøke ein gammal gard vil vi utvikle oss til å bli den beste og mest autentiske opplevelsen du vil få i Olden.